अत्यंत कठीण आणि आव्हानात्मक मानल्या जाणाऱ्या ‘सीएमए’ (CMA – Cost and Management Accountant) या राष्ट्रीय स्तरावरील परीक्षेच्या अंतिम फेरीत वाई (Wai News) तालुक्यातील बलकवडी गावच्या सुपुत्राने दैदीप्यमान यश संपादन केले आहे. बलकवडी येथील रहिवासी वेदांत संजय जाधव याने ‘सीएमए फायनल’ (CMA Final) परीक्षा उत्तीर्ण होत हे उत्तुंग यश संपादन केले आहे. इन्स्टिट्यूट ऑफ कॉस्ट अकाउंटंट्स ऑफ इंडिया (ICMAI) तर्फे जून २०२६ च्या परीक्षेचा निकाल जाहीर करण्यात आला. या परीक्षेत वेदांत याने ४०० पैकी २३७ गुण मिळवत यश मिळवले.
सातत्यपूर्ण अभ्यासाच्या जोरावर यश
कॉमर्स आणि फायनान्स क्षेत्रातील अत्यंत कठीण मानल्या जाणाऱ्या या परीक्षेसाठी वेदांतने रोज ६ ते ७ तास नियोजनबद्ध आणि सातत्यपूर्ण अभ्यास केला. अत्यंत सखोल अभ्यासक्रम, कडक मूल्यमापन आणि प्रॅक्टिकल प्रश्नांचा भडिमार असलेल्या या परीक्षेत पहिल्यापासूनच अत्यंत एकाग्रतेने अभ्यास केल्यामुळे हे यश शक्य झाल्याचे वेदांतने सांगितले.
आई-वडिलांच्या कष्टाचे चीज
वेदांतचे वडील संजय सखाराम जाधव आणि आई सुनंदा संजय जाधव यांनी वेदांतच्या शिक्षणासाठी कायम प्रोत्साहन दिले. आपल्या पाल्याने उच्च शिक्षण घेऊन मोठे व्हावे हे स्वप्न उराशी बाळगणाऱ्या आई-वडिलांच्या पाठिंब्यामुळेच आज हे यश संपादन करता आले, अशी भावना वेदांतने व्यक्त केली. वेदांतच्या या यशाबद्दल बलकवडी गाव आणि संपूर्ण वाई तालुक्यातून त्याच्यावर कौतुकाचा वर्षाव होत आहे.
राष्ट्रीय पातळीवरील गुणवंतांची यादी (ICMAI Toppers List)
ICMAI तर्फे जाहीर करण्यात आलेल्या निकालात देशभरातून ४,२२० विद्यार्थ्यांनी CMA Final परीक्षा पूर्ण केली आहे. या परीक्षेत मोक्षित वामसी कृष्णा मट्टुपल्ली याने देशात प्रथम (Rank 1) येण्याचा बहुमान मिळवला, तर राहुल कैलास भोईर याने दुसरा (Rank 2) आणि वन्नेमरेड्डी हेमंत याने तिसरा (Rank 3) क्रमांक पटकावला. तसेच, ‘CMA Inter’ परीक्षेत रौनक जैन याने देशात प्रथम स्थान पटकावले आहे.
Discover more from मराठी चौक विशेष
Subscribe to get the latest posts sent to your email.